Wednesday, July 6, 2011

كلام سيكوباتي

بعد كل مرّة بنتقابل .. بعد كل مرّة بنتكلم في التليفون .. بعد كل مرّة ببعتلك فيها رسالة .. دايما بيجيلي خاطر انّي عايزة أعيد من الأول .. بيتهيألي انّي أقدر أعيد المكالمة أو المقابلة بطريقة أحسن ..  .. انّي ممكن أصيغ أفكاري بصورة أوضح .. انّي لو كنت بصيت في وشك وانت بتقولّي الجملة ديه، كنت هفهم أكتر .. انّي كان المفروض أسألك كنت تقصد ايه بظبط بالكلمة ديه .. أو انّي كان المفروض أقولك اللي كنت بفكّر فيه وما أخافشي .. في كل مرّة بيحصل فيها بينّا حاجة، بيبقى نفسي بعد ما تخلص أعيدها تاني، عشان أعيش اللحظة تاني .. عشان أصدق .. أو عشان أبطل أخاف .. ـ
لولا انّي بخاف أبان ساذجة، أو مبتذلة، أو مفتعلة .. كنت طلبت منّك انّك بعد ما تقفل معايا في التليفون، تبعتلي مسج تقولّي انّك اتبسطت في المكالمة .. وبعد ما نسيب بعض ونمشي، تتصل بيّا تقولي ان اليوم كان حلو .. كنت طلبت منّك ان بعد كل حاجة، تقولّي ما تخافيش .. ـ

أكد لي أن شيئا سيدوم بيننا .. فقدري أنني تأثرتُ بأشياء تجرعتها وحدي إلى حد المرض* .. ـ
--------

1 comment: